Ávarp formanns við úthlutun styrkja úr Menningarsjóði Vesturlands 2011
Þingmenn Vesturlands, sveitarstjórnarmenn, styrkhafar og aðrir góðir gestir.
Fyrir hönd Menningarráðs Vesturlands býð ég ykkur hjartanlega velkomin til þessarar athafnar vegna úthlutunar styrkja úr Menningarsjóði Vesturlands fyrir árið 2011.
Ég vil í upphafi þessa ávarps míns lýsa ánægju minni með að nú liggi fyrir vilji ríkisins um endurnýjun samninga við menningarráðin og í þetta sinn til þriggja ára. Samningurinn mun innan tíðar verða undirritaður milli ríkisvaldsins og Samtaka sveitarfélaga á Vesturlandi. Ánægjulegt er að aðilar hafa náð samkomulagi um endurnýjun samningsins, en það er eindregin mín skoðun að það fjármagn sem samningurinn gerir kleift að veita til einstakra menningarverkefna hér á Vestulandi hafi verulega þýðingu, menningarlífinu til framdráttar.
Þetta er í sjötta sinn sem menningarráð Vesturlands úthlutar fjármunum, að þessu sinni í glæsilegum húsakosti Menntaskólans í Borgarbyggð.
Menningarráð Vesturlands var stofnað í árslok 2005 á grundvelli samnings á milli sveitarfélaganna á Vesturlandi og menntamála- og samgöngu-ráðuneytis sem hefur gert okkur kleyft að styrkja myndarlega ýmis verkefni sem einstaklingar, félög og félagasamtök hafa sótt um til ráðsins.
Framlög ríkissjóði til ráðsins eru 23,4 millj. á árinu 2011 sem er 2,6 milljón króna lækkun frá árinu 2010. Sveitarfélögin á Vesturlandi munu leggja til framlög til ráðsins, samtals um 10,5 millj. króna, sem er óbreytt framlag frá árinu áður og veldur því að hægt verður að úthluta sambærilegum fjárupphæðum á árinu 2011 og gert var á árinu 2010 þrátt fyrir áðurnefnda lækkun frá ríkissjóði.
Úthlutun á árinu 2011 verður í heild sinni um 26,6 milljónir króna, sem er ánægjulegt í ljósi aðstæðna í þjóðfélaginu. Til gamans má geta þess að uppreiknað til dagsins í dag eru styrkveitingar Menningarráðs Vesturlands orðnar 160 milljónir króna á þessum 6 árum og það munar nú um minna en það, hefði ég haldið.
Umsóknir í sjóðinn í ár voru 138 talsins og alls var sótt um 92 miljónir og til úthlutunar koma liðlega 26,6 milljónir eins og áður segir. Umsóknum hefur fjölgað lítillega á milli ára og er það gleðilegt út af fyrir sig, sér í lagi í ljósi þess að aðstæðurnar í þjóðfélaginu skapa þeim sem sækja um styrki erfitt fyrir að fjármagna sinn hluta verkefnanna.
Sem fyrr vekur það að sjálfsögðu mikla ánægju meðal okkar ráðsmanna að sjá hversu gróskumikið og metnaðarfullt starf það er sem umsækjendur vinna varðandi verkefnin sín. Mörg þeirra verkefna sem menningarráðið hefur styrkt undanfarin ár hafa vakið mikla athygli, verið vel sótt og eru vel og fagmannlega unnin. Þessi verkefni auðga mannlíf og draga fram svo margt jákvætt í umhverfi sínu. Allt þetta sannfærir okkur enn frekar um það hversu gríðarlega mikilvægur samningurinn við ráðuneytin er okkur Vestlendingum og að við séum á réttri leið með það fyrirkomulag sem unnið er eftir, þótt auðvitað megi alltaf bæta reglur og fyrirkomulag.
Margar góðar umsóknir bárust að þessu sinni og eru þær um margt mjög metnaðarfullar, margbreytilegar og spanna vítt svið hugtaksins menning, má þar nefna t.d. kórverk, fjölmenningu, kvikmyndahátíð, tónleika ýmis konar, leikrit og er þá aðeins lítið upptalið, en þó er ekki hægt að horfa fram hjá þeirri staðreynd að nauðsynlegt er fyrir umsækjendur að vanda umsóknir sínar, bæði hvað varðar frágang umsóknar og ekki síður að leggja metnað í verkefnin.
Góðir gestir. Ég vona að við getum átt saman góða stund hér í dag og glaðst yfir blómlegu og fjölbreyttu menningarári á Vesturlandi.
Hér á eftir mun Elísabet Haraldsdóttir menningarfulltrúi stýra samkomunni og mun hún afhenda styrkhöfum framlög sín með aðstoð fulltrúa iðnaðarráðuneytisins Helgu Haraldsdóttur.
En áður en lengra er haldið vil ég kynna listafólk úr Borgarðbyggð. Þau kynna sjálf sitt atriði og ég bið stjórnendur að taka við.
Jón Pálmi Pálsson, formaður Menningarráðs Vesturlands.
