Ágætu aðalfundargestir
Árið 2010 var fimmta heila árið sem Menningarráð Vesturlands starfar, en ráðið var skipað í desember 2005 á grundvelli samnings sveitarfélaga á Vesturlandi við þáverandi menntamála- og samgönguráðuneyti.
Menningarráðið hélt 12 formlega stjórnarfundi á árinu 2010 að viðbættum tveimur aðalfundum ráðsins, en þegar sveitarstjórnarkosningar eru þá verður ráðið að halda tvo aðalfundi vegna skipunar í stjórn ráðsins. Fundað var víða á starfssvæðinu, en það hefur verið stefna ráðsins að fundunum sé dreift á starfssvæðið, bæði til að gera ráðið sýnilegra svo og að fulltrúar ráðsins geti kynnt sér málin betur innan svæðisins. Einnig voru samskipti nefndarmanna og menningarfulltrúa mikil með tölvusamskiptum á milli funda.
Menningarráðið auglýsir árlega eftir styrkjum í lok árs á grundvelli formlegra úthlutunarreglna sem hlutaðeigandi aðilum hafa verið kynntar með auglýsingum svo og á heimasíðu Menningarráðs. Að afloknum kosningum bauð stjórn Menningarráðs sveitarstjórnum að kynna starfsemi ráðsins fyrir nýkjörinni sveitarstjórn og þeim öðrum sem hentaði. Slíkt boð þáðu einungis þrjár sveitarstjórnir.
Á starfsárinu 2010 bárust 116 umsóknir um ýmis verkefni og voru heildarbeiðnir um 74,9 milljónir króna, en ákveðið var að veita styrki til 79 verkefna að fjárhæð 30,3 milljónir króna sem er hæsta úthlutun sem Menningarráð Vesturlands hefur veitt fram til þessa. Úthlutun fór fram í Átthagastofu í Ólafsvík þann 26. mars að viðstöddum fjölda gesta þ.á.m. mennta- og menningarmálaráðherra sem undirritaði við það tækifæri nýjan samning við SSV um Menningarráð Vesturlands. Einnig voru viðstaddir strykhafar og aðrir góðir gestir.
Það er mikið verk að yfirfara allar umsóknir og úthluta þeim takmörkuðu fjármunum sem ráðið hefur til úthlutunar, og eru þær úthlutanir alls ekki yfir gagnrýni hafnar. Menningarráð leitast við á hverjum tíma að ná sem mestri sátt um úthlutanir og að hafa úthlutunarreglur eins skýrar og kostur er. Sem lið í þeirri viðleitni hafa menningarráðin og menningarfulltrúar landshlutanna með sér samvinnu með það fyrir augum að samræma reglur og vinnubrögð hvað þessi mál varðar. En engu að síður eru góð ráð í þeim efnum að sjálfsögðu vel þegin.
Nú sjá menningarráðin loks fram á nokkra festu í starfsemi sinni, en s.l. föstudag var gengið frá nýjum samningum um menningarráðin sem gilda til næstu þriggja ára. Það út af fyrir sig er gleðiefni fyrir landsbyggðina, þar sem segja má að núverandi fyrirkomulag er fest í sessi og gefur tækifæri til að vinna skipulegar að þessum málum hvað næstu framtíð varðar.
Þó er það visst áhyggjuefni að fjárframlög ríkisins hafa lækkað nokkuð frá fyrri árum, en engu að síður ríkir bjartsýni um að hægt verði að hækka þessi framlög þegar fram líða stundir og erfiðleikar þjóðfélagsins eru að baki.
Í nýjum samningi er gert ráð fyrir framlögum sveitarfélaganna eftir sem áður, en regluverkið einfaldað nokkuð og eru framlög þeirra nú að lágmarki sem nemur 40% af framlagi ríkisins.
Við sveitarstjórnarkosningar urðu mannabreytingar í stjórn. Guðrún A. Gunnarsdóttir sem setið hefur í stjórn frá upphafi hætti störfum og í hennar stað kom Dagbjört Höskuldsdóttir sem fulltrúi Snæfellsness og Eiríkur Ólafsson fulltrúi Borgarbyggðar hætti einnig og í hans stað kom Ragnar Frank Kristjánsson. Menningarráð færir þeim Guðrúnu og Eiríki bestu þakkir fyrir mikið og gott starf í þágu menningarmála á Vesturlandi og óskar þeim velfarnaðar í störfum sínum á nýjum vetvangi.
Menningaráðið skipa nú eftirfarandi aðilar:
• Jón Pálmi Pálsson, formaður, tilnefndur af sveitarfélögunum sunnan Skarðsheiðar.
• Dagbjört Höskuldsdóttir tilnefnd af sveitarfélögunum á Snæfellsnesi.
• Ragnar Frank Kristjánsson tilnefndur af sveitarfélögunum í Borgarfirði norðan Skarðsheiðar.
• Halla Steinólfsdóttir tilnefnd af Dalabyggð.
• Kristjana Hermannsdóttir tilnefnd af SSV.
Menningarfulltrúi er sem fyrr, Elísabet Haraldsdóttir.
Menningarráðið hefur gefið út veglega ársskýrslu sem liggur fyrir hér á fundinum og vísa ég til hennar um frekari störf ráðsins og mun menningarfulltrúi gera nánar grein fyrir henni svo og ársreikningi menningarráðs fyrir árið 2010 síðar á fundinum
Ég lít björtum augum á framhald mála hér á Vesturlandi hvað menningarmálin áhræir, því sjá má að tilurð menningarráðsins og þeirra fjármuna sem veittir eru á þess vegum til ýmissa verkefna, skila samfélaginu miklu til aukinna lífsgæða fyrir íbúa Vesturlands og því viljum við halda áfram. Um það eru aðilar menningarsamningsins sammála trúi ég.
Að lokum vil ég þakka samstarfið á árinu sem nú er lokið, meðnefndarfólki mínu bæði fráfarandi og núverandi svo og menningarfulltrúa
Einngi vil ég færa stjórn og framkvæmdastjóra SSV þakkir fyrir þeirra þátt í samningagerð við ráðuneytin svo og sveitarfélögunum fyrir velvilja þeirra hvað fjárveitingar varðar til ráðsins.
Jón Pálmi Pálsson, formaður.
